បាងកក៖ មេដឹកនាំក្រុមអាវលឿង ចម្លង ស្រីមឿង បាននិយាយនៅថ្ងៃពុធ ទី០២ កុម្ភៈនេះថា រដ្ឋាភិបាលត្រូវតែជួយឲ្យមានការដោះលែងជនជាតិថៃ ២នាក់ ដែលជាប់ឃុំនៅប្រទេសកម្ពុជា ហើយនាំពួកគេត្រឡប់មកប្រទេសកំណើតវិញនៅក្នុងរយៈពេល ៣ថ្ងៃ ឬក៏ប្រឈមមុខនឹងសម្ពាធកាន់តែខ្លាំងពីក្រុមបាតុករអាវលឿង។
ចម្លង ស្រីមឿង មេដឹកនាំក្រុមសម្ព័ន្ធភាពប្រជាជនដើម្បីលទ្ធិប្រជាធិបតេយ្យ (PAD) ឬក្រុមអាវលឿង ត្រូវបានគេហទំព័របាងកក ប៉ុស្តិ៍ ដកស្រង់សម្តី ដែលបាននិយាយថា៖ «យើងនឹងទុកពេលឲ្យរដ្ឋាភិបាលដល់ថ្ងៃទី០៥ កុម្ភៈ ដើម្បីធ្វើតាមការទាមទារ។ ប្រសិនបើរដ្ឋាភិបាលមិនព្រមធ្វើដូច្នេះទេ ក្រុម PAD នឹងប្រកូកប្រកាសក្រុមអាវលឿង ឲ្យមានការតវ៉ាតាមដងផ្លូវដ៏ធំមួយ ដើម្បីដាក់សម្ពាធលើរដ្ឋាភិបាល ឲ្យទទួលខុសត្រូវសម្រាប់បរាជ័យបែបនេះ»។
បាងកក ប៉ុស្តិ៍ បានរាយការណ៍បន្តថា អតីតមេទ័ពចូលនិវត្តន៍រូបនេះបានបដិសេធទៅនឹងសេចក្តីរាយការណ៍នានា ថា ក្រុមប្រជាជនអាវលឿង មានផែនការដុតបំផ្លាចស្ថានទូតកម្ពុជាក្នុងទីក្រុងបាងកក ដើម្បីជាការសងសឹកទៅនឹងការកាត់ទោសដាក់ពន្ធនាគារជនជាតិថៃ ២នាក់ ពីសំណាក់តុលាការរាជធានីភ្នំពេញ។
បាងកក ប៉ុស្តិ៍ បានស្រង់សម្តីរបស់ ចម្លង ស្រីមឿង ដែលបានថ្លែងថា៖ «ក្រុម PAD នឹងមិនអុចអាលឲ្យមានអំពើហិង្សាណាមួយទេ។ ប្រសិនបើស្ថានទូតកម្ពុជា ពិតជាត្រូវបានដុតមែន វានឹងមិនមានអ្វីត្រូវចោទមកលើក្រុមអាវលឿងឡើយ»។
តុលាការកម្ពូជា កាលពីថ្ងៃអង្គារម្សិលមិញ បានកាត់ទោស វីរៈ ស៊ុំខ្វាមឃីត សហការីនៃបណ្តាញអ្នកស្នេហាជាតិថៃ (TPN) ឲ្យជាប់គុក ៨ឆ្នាំ ហើយ រាទ្រី ផៃផាតាណាផៃប៊ូន ជាប់ទោស ៦ឆ្នាំ ក្រោមបទចោទប្រកាន់ចារកម្ម និងឆ្លងដែនខុសច្បាប់៕
No comments:
Post a Comment